Cossizu regionale, sa pius ricca est Anna Maria Busia (Cd)
Sos resultados de s'analisi chi si faghet onzi annu
Di: Pietro Lavena
Occannu puru sunt bessidos sos datos de s'analisi chi onzi annu narat cales sunt sos redditos de sos cossizeris regionales sardos. Sa pius ricca, pro cantu reguardat su 2016, resultat Anna Maria Busia (Centro Democratico).
Busia, chi est avvocadu, balanzat 231.083 euros a s'annu. Li ponent fattu su coordinadore regionale de Forza Italia Ugo Cappellacci, cummercialista, 207.762 euros, e su capugruppu de Forza Italia Pietro Pittalis, avvocadu, 148.762 euros.
Altos meda resultant finas sos istipendios de su presidente de su Cossizu, Gianfranco Ganau, duttore, chin 109.931 euros e de su presidente de sa Regione Francesco Pigliaru, chi insegnat in s'universidade, e balanzat 114.614 euros.
Alfonso Marras de s'Udc, imbetzes, est su chi balanzat pius pagu de sos 60 onorevoles. Su redditu sou est de 11.660 euros. Pagu de pius pro Gianni Lampis de Fratelli d'Italia, chi però ch'est istadu bogadu dae su Cossizu pro sententzia de su tribunale, e balanzat 17.302 euros. Luigi Paolo Dessì de Forza Italia, chin 33.009 euros est isse puru de sos ultimos.
