Su sindigu de Durgali, Maria Itria Fancello de su Movimento 5 Stelle, est istada indagada dae sa Procura de Nuoro ca tiat aere imbruttadu un'asta.

Fancello e tottu at postu sa notiscia in Facebook segundu cussu ispiritu de onestade chi preigant sos grillinos.

"Cherìo infrommare sos tzittadinos de Durgali chi m'est istadu comunicadu chi sas indagines de sa procura de Nuoro sunt istadas prorogadas. A cantu paret, so indagada impare a maridu meu, chi trabagliaiat pro sa cooperativa Ghivine, e a s'assessore Fabrizio Corrias pro aer imbruttadu un'asta".

"Chi m'ammente eo, no appo retzidu avvisos de garantzia e mancu ischìo chi fint indaghende subra de a mie, tiat reguardare sa gara de appaltu pro sa gestione de sos sitos archeologicos. Unu bandu chi est istadu pubblicadu sa die poi de s'intrada de su cossizu nou. Pro custu motivo ne eo ne atteros de sa giunta b'intramus nudda chin sa gara chi est istada assignada dae una commissione naschida pro cussu".

"Creo in sa giustiscia e mi cunfortat su fattu de aere semper trabagliadu pro su bene de sa bidda mia. Bos lu devìo narrere pro cussa trasparentzia chi distinghet su Movimento 5 Stelle. Bos fatto ischire si bi sunt novidades".