Sa Corte de assise de Appellu de su Tribunale de Perugia at assolvidu su bandidu sardu Attilio Cubeddu dae s'accusa de aer mortu s'ispettore de sos Nocs Samuele Donatoni.

Donatoni morzeit isparadu in su 1997 in unu biviu de s'istrada Roma-L'Aquila cando fit indaghende subra de su sequestru de s'imprendidore Giuseppe Soffiantini.

Cubeddu isteit cundennadu a s'ergastulu pro custu fattu e sos avvocados suos, Rita Dedola e Francesco Marongiu, ant pedidu a sos zuighes de torrare a bidere sos documentos de su protzessu.

Calchi espertu chi aiat già bidu sos documentos aiat giaridu chi a bocchire s'ispettore, in un isparadoria, isteit unu companzu sou e tottu pro imbagliu. Su cumplitze de Cubeddu, Giovanni Farina, isteit già assolvidu propriu pro custu motivu.

Como est toccadu a su bandidu de Artzana chi a 69 annos est balu in sa lista de sos bandidos pius chilcados de Italia. Est bandidende dae su 1997.

Sa sententzia chi l'at assolvidu est arrivida impare a sa cunfrimma de sa cundenna a 30 annos de presone pro su sequestru Soffiantini.