Camiu de su latte brujadu in Irgoli
Duos bandidos armados ant frimmadu s'autista custu manzanu
Di: Pietro Lavena
Unu camiu de su latte est istadu brujadu custu manzanu a sas 8 in Irgoli. Sos pompieris de Siniscola e de Nuoro sunt intervennidos inie impare a sa giustiscia.
Segundu cantu s'ischit, duos bandidos armados e caratzados ant frimmadu s'autista de su mezu custringhendelu a si nde falare. Poi ant postu fogu a sa cisterna.
Est su segundu camiu de su latte brujadu poi de cussu de su 25 de frearzu in Nule.
Sos assaltos a sos camios de su latte, dae s'incomintzu de sa gherra de sos pastores, sunt una deghina in tottu.
Oe sos pastores ant a abbojare in Barì, in Ozastra, pro arrejonare de su preju de su latte.
