Sos carabineris agattant tres bandidos in Su Gologone, pistoladas intro de notte
Los ant iscobertos furende duos mezos
Di: Pietro Lavena
Carabineris e bandidos ant fattu a pare, a sas duas de custu manzanu, in Uliana. Sa giustiscia fit cuntrollende sa zona de Su Gologone cando ant bidu duos mezos, unu camieddu e una pala meccanica, e ant chilcadu de los frimmare.
Tando, sos tres omines chi fint intro de sos mezos, sunt bessidos a fora caratzados e ant incomintzadu a isparare contra a sos carabineris. Sos militares ant rispostu issos puru ma sos bandidos sunt resessidos a fuire.
Niunu est istadu feridu. Sos mezos sunt resultados furados istanotte e tottu in Uliana, acultzu a inue est capitadu su fattu ant agattadu finas un'Alfa 147 furada in Tattari a primos de s'annu e chi est istada impittada dae sos bandidos pro si che fuire dae Su Gologone.
Sos carabineris ant proadu totta die a agattare sos fuidittos chin bloccos e chilcas. Pro como no si nd'at ischidu nudda.